Ва Уздзе з’явілася лаўка закаханых. Такі падарунак гораду зрабіла творчая каманда нераўнадушных людзей, якія адгукнуліся і падтрымалі ідэю раённай арганізацыі грамадскага аб’яднання “Белая Русь” і раённага аб’яднання прафсаюзаў.
Рамантычную каваную лаўку з велізарным сэрцам устанавілі каля ЗАГСа, што даволі сімвалічна: адсюль у самастойны палёт па дарозе жыцця адпраўляюцца закаханыя сэрцы, саюз якіх замацаваны заручальнымі пярсцёнкамі.
Ва ўстаноўцы лаўцы прымалі ўдзел заслужаная артыстка Рэспублікі Беларусь Ірына Дарафеева і заслужаны дзеяч культуры БССР, народны артыст Беларусі Эдуард Ханок.
– Зроблена канструкцыя не толькі за сродкі нашых арганізацый, але і пры фінансавай падтрымцы прадпрыемстваў раёна “АйВекаБуд”, “Піндрэў”, “ТрансВанс”, Мінскай абласнай арганізацыі Беларускага прафсаюза работнікаў дзяржаўных і іншых устаноў, – паведаміла старшыня раённай арганізацыя РГА “Белая Русь” Таццяна Мятліцкая.
Як сказала ў час устаноўкі лаўкі Ірына Дарафеева, хочацца спадзяюцца, што калі закаханыя пасядзяць, абняўшыся на такой прыгожай лаўцы, то ў сямейным жыцці ў іх усё будзе толькі на выдатна. Без сумнення, так і павінна быць.
Як правіла, на лаўках закаханых намаляваны два сэрцы, якія сімвалізуюць каханне, прыхільнасць і вернасць. І прызначаны яны для закаханых усіх узростаў ці для адзінокіх людзей, якія зусім не супраць з кім-небудзь пазнаёміцца. Размяшчаюцца такія лаўкі звычайна ў парках, у іншых месцах адпачынку. Сёння такія лаўкі ёсць у многіх гарадах свету, і іх колькасць пастаянна расце. Цяпер такая ёсць і ў нашым горадзе.
